CEBU, Philippines — Ang mga bisitang players nga sila si Heinz Carbonilla ug Gerald Gemida maoy unang nakasud sa finals ubos sa boys 12 category sa 23rd JRG Gullas Cup tennis tournament kagahapon sa CitiGreen Tennis Resort sa Barangay Punta Princesa, dakbayan sa Sugbo.
Ang topseed nga si Carbonilla sa Maranding, Lanao del Norte mitagak sa Sugboanong si Chad Connor Cuizon nga iyang giserohan.
Si Carbonilla mosuway og langkat sa gold medal batok ni Gerald Gemida sa Ormoc City nga mipasibat sab sa laing Sugboanon nga si Geo John Manito, 10-7 sa laing boys 12 semis.
Nanghinaut si Carbonilla nga makapasol og duha ka isda gumikan kay miabante sab siya sa boys 14 semis human midaog batok ni Cymmer James Casem, 10-3.
Duna sab hinuo'y daghan mga Sugboanon nga mipabuhi sa ilang tsansa nga makampiyon sa tagsa-tagsa nila ka dibisyon.
Ang garbo sa Bogo City nga si Raymund Goco mitikang sa boys 14 semis ug iyang harungon ang top-ranked nga si Nash Agustines sa Oroquieta City. Abante sab sa Final Four sila si Vinz Alforque (boys 16) ug Francis Lambayan (boys 18).
Didto sa Alta Vista Golf and Country Club,si Tifanny Nocos sa Lapu-Lapu City milayat sa girls 16 semis human gipilde si Jullianna Maravillas, 10-1.
Sa girls 18, ang mga Sugboanon nga sila si Elizabeth Abarquez ug Zethley Mae Alferez hapit na sab mag-unay alang sa korona human gipalagpot silang Rica Gudelosao, 10-1 ug Ellaine Bahonsua, 10-3. (BANAT NEWS)