CEBU, Philippines — Mimartsa na sa semifinals sa unisex 10-under division ang Cebuano nga si Aaron Kevin Tabura human niya gipapha sa quarterfinals si Aaron Galo, 4-1, 4-0, sa 23rd JRG Gullas Tennis Cup kagahapon didto sa Alta Vista Golf and Country Club sa Barangay Pardo, Cebu City.
Sama ni Tabura, misud usab sa semis si Chauncy Aguanta sa Cagayan De Oro City dihang gilampornas niini si Francis De Juan, 4-2, 4-0.
Gawas sa unisex-10, si Tabura mamasin usab og luna sa semis sa boys 12 human siya miabante sa quarters dihang gilubong niya si Devin Yap, 10-1.
Ang ig-agaw ni Aaron Kevin nga si Gio John Manito misud sa second round apan ang usa nila ka ig-agaw nga si Clarence nasugamak batok sa taga Manila nga si Akuretiyagama, 9-10.
Laing mga misud sa quarters sa boys 12 mao sila si Heinz Carbonilla, Douglas Maravillas, Sean Esick, Chad Connor Cuizon ug Gerald Gemida.
Sa boys 14, si Eric Longakit miabante sa quarters human midaog batok ni Micos Cadelasa, samtang sila si Vinz Lominoque ug Venz Alforque mamasin og luna sa semis sa boys 16 karon.
Didto sa Alta Vista Golf and Country Club, si Corazon Lambonao milabni og luna sa quarters sa girls 14 uban ni Mila Gemida.
Ang taga-Lapu-Lapu City nga si Tiffany Nocos ug taga-Danao nga si Nicole Dela Rita anaa na usab sa quarters sa girls 16. (BANAT NEWS)