Kasaysayan sa Philippine boxing

CEBU, Philippines – Kasaysayan ang seguradong mapatik sa Philippine boxing sa dihang si Jerwin Ancajas (27-1-1, 19KOs) modepensa sa iyang IBF super flyweight title  batok sa kababayan niyang si Jonas Sultan (14-3, 9KOs) karong adlawa didto sa Save Mart Center sa Fresno, California.

Mao    kini   ang labing unang world championship bout diin mag-unay ang duha ka Pinoy'ng boksidor sud sa 93 ka tuig. Ang katapusan nahitabo niadtong Mayo 2, 1925 didto sa Manila diin si Pancho Villa milampos pagdepensa sa iyang trono isip world flyweight champion human gibuntog si Clever Sencio pinaagi sa desisyon.

Parehong yano nga gikuha sa duha ka boksidor ang ensaktong timbang atol sa official weigh-in kagahapon timaan sa ilang kaandam sa 12 ka hugna nilang kumbati.  Sa ilang tapad, si Ancajas maoy inilog gumikan sa halapad niyang kasinatian.

Apan si Ancajas gikinahanglan nga magmatngon sa pambato sa ALA Gym.

Si Sultan mao kanunay ang dehado sa dihang miaway siya batok ni two-division world champion Johnriel Casimero ug two-time world title challenger Sonny Boy Jaro sa miaging tuig, apan nakamaneho siya pagdaog. Gipakamang ni Sultan si Jaro sa ikawalong hugna ug dayon mipakurat ni Casimero pinaagi sa desisyon sa ilang IBF eliminator nga maoy naghatag kaniya og katungod nga mohagit ni Ancajas.

Bisan  kinsa ang modaog nilang duha, sila si Ancajas ug Sultan angayan lamang nga pahalipayan gumikan sa pag-isa nila sa bandila sa Pilipinas sa kalibotanong bantawan sa boksing bugti ning maong talagsaon nilang sangka.