CEBU, Philippines — Nakabalik na gyud sa playoffs ang Minnesota Timberwolves human mataak ang tungason nilang kadaogan batok sa Denver Nuggets, 112-106 sa krusyal nilang duwa sa NBA kagahapon didto sa Minneapolis, Minnesota.
Si Jimmy Butler mikadlit og 31 puntos, samtang si Karl-Anthony Towns mitali og 26 puntos ug 14 ka rebounds sa Timberwolves nga miputol sa labing taas nga huwaw sa playoff sa usa ka team sa NBA.
Mao kini ang labing unang pagtaak sa Wolves sa playoffs sud sa 14 ka tuig.
Bukid hinuon maoy tungason sunod sa Wolves kay ilang banggaon mao man ang haring gangis sa Western Conference nga Houston Rockets sa unang hugna sa playoffs.
Didto sa Philadelphia, si Markel Fultz mirehistro sa labing unang ‘triple-double’ sa iyang karera uban ang 13 points, 10 rebounds ug 10 assists, samtang sila si Justin Anderson ug si Dario Saric nagkumboya’g 49 puntos sa dihang gilat-an sa Sixers ang Milwaukee Bucks, 130-98.
Dili na malalis kun asa pabor ang dagan sa duwa human ang Sixers miposte og 36 puntos nga labaw sa halftime, 80-44. Gawas nga miinat sa nagkadina nilang daog ngadto sa 16 ka duwa, pormal sab nga giangkon sa Sixers ang No. 3 spot sa Eastern Conference playoffs.
Sa uban pang mga resulta, si LeBron James misalida sa ika-82 niyang duwa, miiskor og 10 puntos apan gipapahuway ra sab dayon sa 98-110 nga kaparotan sa Cleveland Cavaliers batok sa New York Knicks, samtang si Wayne Ellington mipabuto og career-high 32 puntos sa dihang gipakaging sa Miami Heat ang Toronto Raptors sud sa overtime, 116-109 aron pagsilyo sa ikaunom nga luna sa East.
Wala sab magpabitin si Anthony Davis nga mihimo og 22 puntos ug 15 ka rebounds alang sa New Orleans Pelicans nga mipaluhod sa San Antonio Spurs, 112-98, samtang si Aron Bynes mipupo og career-high 26 puntos ug 14 ka rebounds sa Boston Celtics nga midaog batok ang Brooklyn Nets, 110-97.