Timberwolves, Nuggets ilog sa no. 8 spot

CEBU, Philippines — Adunay 12 ka duwa ang ipahigayon sa katapusang adlaw sa elimination round sa NBA karong adlawa ug masentro niini  mao ang sangka tali sa Minnesota Timberwolves ug Denver Nuggets  nga mag-ilog sa katapusang luna sa playoffs nga sugdan sunod semana.

Kompleto na ang walo ka koponan nga magsangka sa Eastern Conference, apan pito pa lang ang anaa sa West human magtabla sa ikawalong dapit sa standing ang Timberwolves ug Nuggets sa ilang 46-35 records.

Gipaabot nga usa ka kulbahinam ang sangka sa duha karong adlawa didto sa  Target Center sa Minneapolis, ang balwarte sa Timberwolves.

Si Timberwolves star scorer Andrew Wiggins nagkanayon nga wala sila’y mabasol sa delikadong sitwasyon karon kun dili ang ilang kaugalingon, apan gidawat nila ang hagit sa usa ka “do-or-die” game batok sa Nuggets.

Gawas ni Wiggins,  mobida sab sa Timberwolves mao sila si Karl Anthony Towns, Jeff Teague, Jimmy Butler ug Derrick Rose.

Atbangan sila sa balanseng line-up sa Nuggets nga sila si All-Star center Nikola Jokic, Gary Harris, Will Barton ug Paul Millsap.

Ang modaog sa duha maoy makakuha sa katungod nga makigsangka sa topseed sa Western Conference nga Houston Rockets  sa playoffs.