Pasundayag sa puwersa ug panaghiusa sa Philippines Arnis

CEBU, Philippines — Ang giatngan nga International Festival of Eskrima Kali Arnis karong weekend diha sa Mountain Wing atrium sa SM Seaside City usa ka pasundayag sa puwersa ug panaghiusa sa arnis dinhi sa Pilipinas.

Matud pa ni Doce Pares Supreme Grandmaster Dionisio ‘Diony’ Cañete nga kapin sa 40 ka mga grandmasters sa nagkadaiyang dapit sa nasud, apil na ang mga notadong personalidad sa Cebu eskrima ang  mopakita sa tagsa-tagsa nila ka mga estilo atubangan sa publiko.

“This is the first gathering of its kind in the history of Filipino martial art. This is a once-in-a-lifetime event, a great collection of highly excellent skills by experts,” matud pa ni SGM Cañete atol sa usa ka press conference kagahapon sa Hotel Fortuna.

Mitambong sab sa maong kalihukan mao sila si Philippine Eskrima Kali Arnis Federation (PEKAF) Executive Vice President Gerald Cañete, Lorenzo ‘Chao’ Sy sa Philippine Sports Commission (PSC), Cebu City Sports Commissioner Alan Borres Delantar, Mon Borromeo sa Department of Tourism (DoT) ug SCOOP-Cebu President Robert ‘Bobby Knight’ Inoferio.

Lakip sa mga banggiitan nga Sugboanong arnisadors nga mopasundayag sa ilang kahanas ning lunlon nga Pinoy martial art mao sila si  GMs Silvano Maranga, Felix Gutang, Jr., Cris Cordezar, Nick Elizar, Jonas Goc-ong, Danilo Jorquia, Tyke Abella, Andres Cañete, Rodrigo Maranga ug Allfredo Carin.

Ania na sab sa Sugbo sila si arnis masters Eunseob Kim ug Eunjung sa South Korea, Kenth Nakamura sa Japan ug Ivan Doyle sa Texas Doce Pares sa Amerika.

Gipaabot sab nga moanhi ang pipila ka mga masters gikan sa Uropa ug Amerika ubos sa pagpangu ni GM Arnulfo ‘Dong’ Cuesta.

Ang duha ka adlaw nga aksiyon magsugod sa usa ka torneyo nga giulohan og “Battle of Champions” karong Sabado diin ang mga grandmasters maoy mo-officiate.

Ning maong kompetisyon, ang mga mananaog sa miaging qualifying events mosuway pag-angkon og luna sa Team Phl nga mokumbati sa 15th WEKAF Championships karong Hulyo 19-25 didto sa Lahaina Civic Center sa Hawaii.

Karong Domingo, ang mga grandmasters mopahigayon og libreng arnis clinic sugod sa alas-10 sa buntag hangtod sa alas-1 sa hapon.