E/F Surplus kampiyon sa 10th J&J Surplus caging

CEBU, Philippines — Happy ang Valentine’s day sa E/F Surplus kay nakadama kini pinaagi sa pagpukan sa ilang karibal nga St. Louis Security Agency, 99-90 ug aron pagsakmit sa korona sa 10th J&J Surplus Ballclub basketball tournament niadtong Pebrero 14 didto sa  GT Academy gym sa Tayud, Lilo-an.

Gawas sa championship trophy, ang E/F Surplus midaog sab og duha ka dagkong awards gumikan kay si Fury Trazona mao man ang napiling season MVP ug si Tingan Gestopa  giila isip Finals MVP.

Si Trazona nga midaog sa maong award sa ikaupat ka sunod-sunod nga higayon ug si Gestopa mao sab ang nangu sa Mythical Five uban nilang Cyde Ravina sa St. Louis, William Alegado sa GT Cosmetics ug Larry Oroyan sa J/J Surplus.

Ang St. Louis maoy  nidominar pagsugod ug miabante pa og 13 puntos  sa second period, 43-40 sa free throws ni Albert Capao. Apan nahimong kulbahinam ang duwa human makatabla  ang E/F Surplus, 53-all sa nahibiling 7:03 sa third period, apan si JP Congson mitira’g 3-pointer aron pagpaabante og tres puntos sa St. Louis, 56-53.

Si Gestopa mipasud og walo ka sunod-sunod nga puntos nga nakapalabaw sa E/F Surplus, 63-58, apan nailog og balik sa St. Louis ang labaw sa katapusang higayon, 64-63 sa duha ka sagunson ni team captain Arvin Tolentino kay ang E/F Surplus milusad og hugot nga depensa.  Ang tres ni Trazona maoy mihatag og komportabling labaw sa E/F Surplus, 72-66 sa fourth quarter.

Si Gestopa mipabuhagay og 27 puntos aron pangulohan ang E/F Surplus, samtang ang team owner nga si Trazona miamot og 14 puntos

Gipangulohan sab ni Ravina ang St. Louis nga mikamada og 24 puntos, gisundan ni JP Congson nga adunay 18 puntos ug Tolentino sa iyang 11 puntos.

Sa gubat alang sa ikatulong dapit, ang GT Cosmetics ni Engr. Leonora B. Salvane mipilde sa J/J Surplus, 106-96 sa pagpangulo ni Edmund Cañete nga mipabuhagay og 32 puntos.

Laing tulo ka batos ni coach Alex Icot ang miiskor sab og double digits.

Samtang ang J/J Surplus ni playing team owner Henry Agbon gipangulohan ni Remegio Adolfo nga mikamada og 25 puntos, gisundan nilang Larry Oroyan ug Jomar Tiwan nga parehong mikadlit og 20 puntos.

PUNTOS MATAG USA

Unang duwa:

GT Cosmetics (106) – Cañete 32, Japos 23, Lascuna 17, Adaptar 12, J. Ponce 8, Apas 8, Monte 6.

J/J Surplus (96) – Adolfo 25, Oroyan 20, Tiwan 20, Herra 17, Dela Rama 16, Genterolizo 2, Astillero 2.

Ikaduhang duwa:

E/F Surplus (99) – Gestopa 27, Trangia 18, Betinol 16, Trazona 14, A. Sabang 8, Igoy 6, Nuñez 4, A. Pepito 2, Ponce 2, K. Sabang 2.

ST. Louis (90) – Cyd. Ravina 24, J. Congson 18, Tolentino 11, Capao 7, Cly. Ravina 6, S. Congson 6, Arcilla 5, Arche 3, Aballe 2, Marikit 2, Acosta 2, Casinillo 2, Escofeld 2.