CEBU, Philippines — Nagmadaugon sa ilang tugkaran ang inilog nga Boston Celtics ug San Antonio Spurs batok sa tagsa-tagsa nilang kaatbang sa nagpadayon nga aksiyon sa National Basketball Association kagahapon.
Didto sa Boston, si Marcus Smart mitali og 16 sa iyang 18 puntos sa second half, samtang si Kyrie Irving mibahog og 16 puntos, siyam ka rebounds ug walo ka assists alang sa Celtics nga nagmangtas sa katapusang kuwarter aron patikangkangon ang Minnesota Timbewolves sa iskor nga 91-84.
Si Terry Rozier miamot og 14 puntos ug siyam ka rebounds, si Aron Baynes mihipos og 11 puntos ug 10 ka rebounds ug si Jaylen Brown miposa’g 11 puntos alang sa Celtics nga miinat sa nagkadina nilang daog ngadto sa lima.
Midaog kaunom sa katapusan nilang pito ka duwa, ang Celtics mipahugot sa ilang pagkupot sa liderato sa Eastern Conference bitbit ang 32-10 nga baraha.
Si Karl-Anthony Towns mitali og 25 puntos ug career-high 23 ka rebounds, apan wa’y nahimo gumikan kay ang Timberwolves nahagsa ngadto sa 24-16.
Sa AT&T Center sa Texas, sila si Kawhi Leonard ug Manu Ginobili mipupo og 21 puntos matag usa sa dihang gipilde sa San Antonio Spurs ang Phoenix Suns sa iskor nga 103-89.
Ang Spurs miduwa nga wala si LaMarcus Aldridge nga tuyo gipapahuway ni coach Gregg Popovich ug ingon man si Danny Green nga dunay angol.
Sa laing aksiyon, si Kris Dunn mirehistro og career-high 32 puntos ug si Justin Holiday midugang og 23 puntos sa dihang ang Chicago Bulls nakaipsot sa kuwadra sa Dallas Mavericks, 127-124.
Sa uban pang mga resulta, sila si Ben Simmons ug Joel Embiid nagkumboya’g 42 puntos sa dihang ang Philadelphia 76ers midismantol sa Detroit Pistons sa iskor nga 114-78, si Jonas Valanciunas mibubo sa tanan niyang 20 puntos sa ikatulong kuwarter nga maoy nahimong taytayan sa Toronto Raptors ngadto sa 129-110 nga demolisyon sa Milwaukee Bucks, samtang si Wayne Ellington mikadlit og 24 puntos sa dihang gipakaging sa Miami Heat ang New York Knicks sud sa overtime, 107-103. (BANAT NEWS)
======