Milagro sa Celtics

CEBU, Philippines — Si Al Horford mipasulod sa iyang ‘hook shot’ sa nahibilin nga 3.7   segundos sa duwa aron pagtuldok sa makalisang nga pagbangon sa Boston Celtics human malubong og 26 puntos dayon na ngadto sa pagpahagsa sa nagkagidlay nga Houston Rockets, 99-98  sa NBA kagahapon  didto sa TD Garden sa Boston, Massachusetts.

Maayo pa unta ang dagan sa Rockets pagsugod  diin ilang gipahimuslan ang pito ka turnovers sa Celtics sa nag-unang otso minutos sa aksiyon aron pagposte og 27-10 nga labaw nga ila pang giinat ngadto sa 26 puntos, 54-28 sa sayong bahin sa ikatulong kuwarter.

Apan ang Celtics wala mawad-i og paglaum, inay nadasig sa mainit nga abiba sa ilang fans ug milusad sila og bagsik nga kontra opensiba hinungdan nga sila nakagukod sa naghinapos nga bahin sa duwa.

Katapusang naglabaw ang Rockets sa iskor nga 98-95 gumikan kay si Jayson Tatum mihansak sa bola aron pagpasikit sa Celtics ngadto sa 97-98 sa nahibiling 7.3 segundos.

Sa ilang posisyon, si James Harden gitawgan og offensive foul batok ni Marcus Smart atol sa inbounds. Si Horford milansang dayon sa iyang baseline half-hook sa katapusang 3.7 segundos nga maoy nahimong yawi sa makapakurat nga kadaogan sa Celtics nga sulagma kaayong mao sab ang una nilang labaw.

Si Kyrie Irving mitapos uban ang 26 puntos, si Tatum miiskor og 19 puntos, samtang sila si Smart ug Terry Rozier mikamada og 13 puntos matag usa alang sa Celtics nga nagbitbit na karon og 29-10 record.

Si Harden mihipos og 34 puntos ug 10 ka assists, samtang si Eric Gordon dunay 24 puntos alang sa Rockets nga nasugamak sa ikaupat nga sunod-sunod nga higayon ug nagpabiling wa’y daog sukad miduwa uban kanila si Chris Paul.

Didto sa San Antonio, ang Spurs milampos pagbihag sa New York Knicks, 119-107  bisan og wala makaduwa sila si Kawhi Leonard ug Rudy Gay.

Si LaMarcus Aldridge mipupo og 25 puntos, si Pau Gasol mitampo og 17 puntos ug 11 ka rebounds, samtang sila si Kyle Anderson ug Tony Parker nagkumboya’g 30 puntos sa Spurs nga mikulit sa ika-17 nilang daog sa 19 ka duwa didto sa ilang balwarte.

Sa uban pang mga resulta, si Eric Bledsoe ug Giannis Antetokounmpo nakatigum og 48 puntos aron pagtabang sa Milwaukee Bucks nga makabawi human mabiyai og 20 puntos dayon na sa pagpakgang sa Minnesota  Timberwolves, 102-96, samtang si Elfrid Payton mikadlit og 19 puntos, walo ka rebounds ug walo ka assists sa dihang gimakmak sa Orlando Magic ang Detroit Pistons, 102-89  aron putlon ang siyam nila ka sagunson nga pilde. (BANAT NEWS)