CEBU, Philippines - Gilubong sa Gilas Pilipinas ang India, 101-70 alang sa ikalima nilang daog sa 39th William Jones Cup kagahapon didto sa Taipei Heping Gymnasium.
Sila si Von Pessumal, Matthew Wright ug Almond Vosotros maoy nanginit og maayo sa opensa hinungdan nga milabaw sila og 22 puntos sa halftime, 46-24.
Ang Gilas aduna na’y 5-3 nga baraha, apan wala na sila’y tsansa alang sa kampiyonato. Bugtong konsolasyon sa Gilas mao ang pagpalambo sa ilang rekord ilabi na kon modaog sila sa ilang duwa batok sa Iran karong hapon.
Ang Gilas wala mahulga sa presensiya sa 7-footer sa India nga si Amiyot Singh Gill kay mobawos sab sila og ataki sa pagpangulo ni Fil-German Chris Standhardinger.
Igo lang nakahimo og kwatro puntos ang import sa Gilas nga si Mike Myers, apan wala kini makabugnaw sa opensa sa nasudnong koponan.
Ang Gilas mitala sa labing dako nilang labaw nga 37 puntos sa katapusang 4:20 sa duwa, 94-57.
Ang Lithuania ug Canada maoy naghari sa standing nga pulos adunay 6-1 records, gisundan sa South Korea nga dunay 6-2.
Bisan og wala na’y paglaum sa kampiyonato, si Gilas coach Chot Reyes kontento ra sa gipakita sa batan-on niyang koponan. (BANAT NEWS)