CEBU, Philippines - Padayon nga nagmangtas ang Mandaue City ug ang labing uwahi nilang gibiktima mao ang Liloan, 83-54 ubos sa North Division Bracket 1 sa 2017 Cebu Governor’s Cup Under-21 Basketball Tournament didto sa Kai Sports Complex sa Liloan.
Human sa bugnaw nga sinugdanan diin sila naglabaw lamang og kuwatro puntos, 17-13, nanginit ang Mandaue sa nagsunod nga tulo ka kuwarter ubos sa liderato ni All-Star center Jancork Cabahug aron paglubong sa Liloan og 29 puntos.
Si Cabahug mitapos og 16 puntos, sila si Froilan Mangubat ug Jeric Gonzaga mitali og 13 puntos matag usa, samtang si John Benedick Damolo miamot og 10 puntos alang sa Mandaue nga nagpabiling wa’y pilde sa upat ka duwa.
Sa laing aksiyon sa Bracket N1, ang Consolacion mipahayag sa ilang tsansa nga makasud sa quarterfinals human gipakugang ang kanhi wa’y pildeng Compostela, 79-65.
Didto sa South, ang Toledo City mipanso sa labing unang quarterfinal ticket sa South Division Bracket 3 human ilang gitumba ang host Barili, 73-61, didto sa Barili Sports Complex.
Si Tommy Bubuli dunay 21 puntos sa dihang giinat sa Toledo ang ilang ratsada ngadto sa upat ka sagunson nga duwa. Miabag ni Bubuli sila si Triple Epilan ug Ralph Reston nga parehong miposte og 10 puntos.
Nagsunod sa Toledo sa Bracket S3 standings mao ang Badian nga midemolis sa Alcantara, 93-49. (BANAT NEWS)