One on One misakmit under-11 title sa CYBL

CEBU, Philippines – Makahigayon lamang sila og praktis matag weekend, apan wala kini nahimong babag sa batan-ong mga baskebolista nga naglangkob sa One on One team aron sila makaporma og usa ka solidong puwersa.

Ang mas dakong surprisa mao ang gipakita nilang salida nga sila mismo wa nila damha.

Sa dalaygon nga kadaogan nga seguradong makapadasig sa linghud nilang karera, ang One on One nga garbo sa lungsod sa Liloan mipakurat sa inilog nga University of the Visayas, 41-30, aron paglangkat sa kampiyonato sa Under 11 age group ubos sa Division One sa Casino Active Cup/Cebu Youth Basketball League (CYBL) 2017 sa miaging semana didto sa Magis Eagles Arena sa Sacred Heart School-Ateneo de Cebu sa Barangay Canduman, Mandaue City.

Ang makapakugang nga kalampusan nakabalda sa tinguha sa UV nga mokulit og kasaysayan sa CBYL human giharos niini ang Under 13, Under 16 ug Under 19 age group titles sa wala pa makigsangka sa One on One.

"Sa sinugdanan pa lamang, wa gyud mi magdahum bisan na lang gani maka-abot mi sa finals kay lig-on man ang kompetisyon. Usa pa, clinic-based team ra mi ug among kontra mga players sa eskwelahan nga sakto og suporta," matud pa ni One on One coach Edsel Vallena, nga usa ka banggiitan nga collegiate ug commercial player sa dihang nagduwa pa siya.

Si CJ Yurag mihipos og 12 puntos alang sa One on One, nga madagison nga mibangon human mabiyai og siyete puntos sa sayong bahin sa duwa, 9-2. Human mailog ang labaw sa ikaduhang kuwarter, mibulhot na ang One on One ngadto sa panganod sa himaya. – EBV (BANAT NEWS)