CEBU, Philippines - Si Jason Canoy sa Omega Boxing Gym mitaak na didto sa Cape Town, South Africa ug mipadayag dayon kini og kaandam sa iyang World Boxing Federation bantamweight title fight batok ni Mzuvikile Magwaca karong Biyernes, Marso 31.
Milanat og halos usa ka adlaw ang biyahe ni Canoy gikan sa Cebu padung sa Cape Town agi sa Dubai.
Bisan og taas-taas nga biyahe, si Canoy wala batia’g kaluya ug naka-adjust dayon kini sa oras ug klima sa maong dapit. Misugat kaniya sa airport mao mismo si WBF President Howard Goldberg. Human mi-check-in sa ilang hotel, gipaubos siya sa mandatory medical check-up sa wala pa siya mibalik sa iyang hotel alang sa gikinahanglan nga pahuway.
Nakaangkon sab og kahigayonan si Canoy nga mahimamat si kanhi world heavyweight champion Frans ‘White Buffalo’ Botha nga dunay exhibition match sa susamang card. (BANAT NEWS)