KaTropa gipasanginlan ni Bowles
CEBU, Philippines – Gipasanginlan ni kanhi PBA Best Import Denzel Bowles ang TNT KaTropa nga wala mibayad sa iyang suhulan ug misuway pa pagkawat sa iyang sapatos.
Si Bowles kinsa gipapauli sa TNT sa wala pa sugdi ang Commissioner's Cup nagkanayon nga nagbuwag siya sa koponan tungod kay dili kabayad ang KaTropa sa iyang suhulan. Gibutyag usab ni Bowles nga adunay sakop sa TNT nga misuway pagkawat sa iyang sapatos atol sa usa ka team practice.
Ang tanang pasangil ni Bowles dali ra usab nga gihimakak sa TNT management ug misumbalik nga adunay ngil-ad nga batasan ang import rasun nga ila kining gipapauli.
“That’s not true. He was fully paid before he left,” matud pa ni TNT team manager Virgil Villavicencio sa Spin.ph.“Usually imports are offered a one-month contract, the two weeks of which are guaranteed. Eksakto na two weeks siya sa amin, so binayaran namin yun. Talk 'N Text has no record whatsoever of not properly compensating its players.”
Midugang si Villavicencio nga sa gibuhat karon ni Bowles, napamatud-an nila nga wala sila masayup sa ilang hukom nga mag-ilis og import.
Si Bowles kinsa nahimong usa sa mga sinaligang import sa liga ug midaog og multiple championship uban sa Star Hotshots, gihulipan karon sa kanhi NBA forward nga si Lou Amundson.
Si KaTropa veteran Ranidel De Ocampo una na usab nga mipasumbingay sa media nga naglisud sila pagsabot sa batasan ni Bowles dihang gikauban nila kini sa practice. – LPM (BANAT NEWS)
- Latest
