CEBU, Philippines - Misalig gihapon si TNT KaTropa head coach Nash Racela sa iyang import nga si Lou Amundson, kanhi magduduwa sa New York Knicks sa National Basketball Association.
Kini bisan pa og pakyas ang giisip nga labing sikat nga import sa PBA Commissioner’s Cup paghatod sa unang daog sa TNT human sila gipilde sa Meralco Bolts niadtong Biyernes. Ang 10-year veteran nga si Amundson mirehistro og 19 puntos ug 18 ka rebounds sa iyang PBA debut, apan nalupig siya sa kaatbang nga import sa Meralco nga si Alex Stephenson nga mihimo og 27 puntos ug milangkat og 20 ka rebounds. Si Amundson may kahigayonan karon nga mamawi sa ikaduhang duwa sa TNT batok sa Phoenix Fuel Masters sa alas-6:45 sa gabii didto sa Ynares Center.
Sa dili pa ang ilang duwa, magharong una ang Rain or Shine Elasto Painters ug Blackwater Elite sa alas-4:15 sa hapon. (BANAT NEWS)