Ibaka, Lopez gisuspenso

CEBU, Philippines - Ang sentro sa Chicago Bulls nga si Robin Lopez ug ang forward sa Toronto Raptors nga si Serge Ibaka gisuspenso sa NBA og usa ka duwa nga wa’y bayad gumikan sa pagsinukliay nila og kumo atol sa mainitong panagbangi.

Sila si Ibaka ug Lopez parehong gitawgan og technical fouls ug dayon na-ejected sa duwa human miulbo ang kagubot tali nilang duha sa nahabilin nga 3:58 sa ikatulong kuwarter.

Ang Raptors maoy midaog sud sa overtime, 122-120. Gumikan sa gipahamtang nga silot, si Ibaka dili makaduwa uban sa Raptors karong adlawa didto sa Miami, samtang si Lopez misilbe sa iyang ban kagahapon sa dihang ang Bulls mi-host sa Detroit Pistons.

Gawas sa duha, si Raptors assistant coach Jamaal Magloire gipamulta sab og $15,000 gumikan sa pagtukmod niini ni Bulls forward Nikola Mirotic nga misuway ra unta og uwang. (BANAT NEWS)