CEBU, Philippines - Wala na mahibulong si defending champion Cleveland Cavaliers coach Tyronn Lue sa gidangatan nila dihang gilubong sila sa Los Angeles Clippers, 108-78 sa duwa nila sa NBA kagahapon didto sa Staples Center sa Los Angeles.
Kini human niya gibangko ang “Big 3” sa Cavs nga silang LeBron James, Kyrie Irving ug Kevin Love nga pulos adunay gipamati nga mga minor injuries.
Si Clippers star Blake Griffin mipahimus sa huyang nga depensa sa Cavs hinungdan nga nakapuntos siya og 23 puntos ug gipangulohan ang Clippers nga miputol sa tulo ka sunod-sunod nilang pilde.
Gawas sa Cavs, laing title contender nga San Antonio Spurs ang napukan usab sa mga kamot sa Memphis Grizzlies, 96-104.
Labaw lang og tulo ang Grizzlies sa katapusang singko minutos sa duwa, apan kalit silang mibiya human sa ilang rally sa pagpangulo nila ni Mike Conley ug Zach Randolph nga mirehistro og 19 ug 18 puntos matag usa.
Sa lain pang mga duwa, ang Golden State Warriors midaog batok sa Milwaukee Bucks, 117-92.
Midaog sab ang Oklahoma City Thunder batok sa Sacramento Kings, 110-94. Duha na lang unta ka rebounds ang kulang ni Russell Westbrook aron makuha ang ika-35 niyang triple-double karon nga season
Si Westbrook, ang nag-unang MVP candidate mihimo’g 28 puntos, 10 ka rebounds ug walo ka assists alang sa Thunder. (BANAT NEWS)