CEBU, Philippines - Nakatilaw nag tulo ka sunod-sunod nga pilde sud sa duha ka tuig
Si Patty Mills miratsada og 21 puntos sa dihang ang San Antonio Spurs mipatilaw sa Golden State Warriors og tulo ka sunod-sunod nga pilde sa labing unang higayon sa milabay'ng duha ka tuig, 107-84, sa NBA kagahapong adlawa didto sa AT&T Center sa San Antonio, Texas.
Apan daghan ang nadisyama sa maong engkuwentro tali sa duha ka higanteng koponan kay pareho man kining miduwa nga wala ang ilang star players.
Wala nang daan ang naangol nga si Kevin Durant, ang Warriors tuyo nga mipapahuway sa labing upat nila ka alas nga mao sila si Stephen Curry, Klay Thompson, Draymond Green ug Andre Iguodala.
Samtang ang Spurs mi-asdang sa korte nga wala sila si Kawhi Leonard, Tony Parker ug Dejounte Murray nga pulos injured. Apan ang mas nakatay-og sa kampo sa San Antonio mao ang balita nga dili usa makaduwa ang star forward nilang si LaMarcus Aldridge gumikan kay aduna kini kakulian sa iyang kasingkasing (basaha ang lahi estorya).
Sa laing aksiyon, si Russell Westbrook mipatuasik og 33 puntos, 14 ka assists ug 11 ka rebounds sa ika-32 niyang triple-double nga maoy nagtuboy sa Oklahoma City Thunder ngadto sa 112-104 nga kadaogan batok sa Utah Jazz.
Gumikan niini, gilabyan na ni Westbrook si Wilt Chamberlain (1967-68) alang sa ikaduhang labing daghan nga triple-double sa usa ka season. Si Oscar Robertson gihapon maoy nagkupot sa record nga 41 ka triple-doubles niadtong 1961-62 season.
Misidlak sab si four-time MVP LeBron James nga mikadlit og 24 puntos, 13 assists ug 12 ka rebounds sa dihang gipakaging sa Cleveland Cavaliers ang Orlando Magic, 116-104, aron santaon ang tulo ka sunod-sunod nilang pilde.
Miabag ni James si Kyrie Irving uban sa iyang 22 puntos, samtang si Tristan Thompson mihipos og 14 puntos ug 13 ka rebounds. (EBV) (BANAT NEWS)