Sunsport modalit og libreng basketball seminar

CEBU, Philippines - Agig pasalamat ngadto sa mga nagsuporta kanila sa milabay'ng 24 ka tuig, ang Sunsports mopasiugda og libreng basketball seminar karong Marso 25 diha sa Sacred Heart Center Sports Club sa may dalan D. Jakosalem ning dakbayan sa Sugbu.

"Usa ko nianang nagtoo sa karaang panultihon nga mas maayo ang mohatag kaysa modawat," matud pa ni Sunsport manager Andrew G. Choachuy. "Nakasustinir mi aning among training kapin sa duha na ka dekada tungod sa mga Sugbuanon nga misuporta namo mao nang mohatag sab mi og balik nila."

Gikatakda gikan sa alas-8 sa buntag hangtud sa alas-12 sa udto, ang maong workshop/seminar abli sa tanan nga interesado labi na kadtong mga mahilig og basketbol, magtutudlo sa PE, mga coaches ug ingon man estudyanteng atleta.

Mopahigayon niini si US-based Cebuano skills trainer/coach Jeff Codera. Ang garbo sa Tabok, Mandaue City miyembro sa Golden State Warriors training camp sa NBA ug usa ka lisensiyadong Gold coach sa USA Basketball.

Ang libreng seminar tataw nga makadugang og interes sa publiko sa umaabot nga 24th Sunsport Basketball Training Camp nga mosikad karong Abril 3.

Ubos sa superbisyon ni camp director Jojo Romarate, ang rehistrasyon sa usa ka bulan nga summer clinic nagkantidad lamang og P1,300 apil na niini ang training jersey, basketball, shoe bag ug t-shirt.

Ang rehistrasyon gikatakda karong Marso 27 hangtud sa Abril 2. Alang sa dugang detalye, mahimong motawag sa 345-1015 o 0923-8697421. (EBV) (BANAT NEWS)