CEBU, Philippines - Naglabad karon ang ulo sa Phoenix Fuel Masters tungod kay dili na madayon si Jarrid Famous pagduwa uban kanila isip import kay gibawi kini sa GlobalPort Batang Pier, kinsa aduna pa’y “playing rights” sa maong American player.
Napahibawo na sa Phoenix nga si Famous ang ilang import alang sa PBA Commissioner’s Cup nga sugdan karong Marso 17, apan ang GlobalPort daling mibaraw kanila tungod kay sila pa ang adunay katungod nga mokuha ni Famous.
Si Famous maoy import sa Batang Pier sa miaging tuig diin mi-average kini og 30.2 points ug 23.1 rebounds.
Tungod niini, daku karon ang problema sa coaching staff sa Phoenix kun kinsa ang kuhaon nilang import kay nabalibaran na nila ang laing higante nga si Brandon Costner, kinsa mipirma na nga moduwa didto sa Puerto Rico. (BANAT NEWS)