Tita Angge mipanaw

CEBU, Philippines - Mitaliwan na sa laing kalibutan niadtong Huwebes sa gabii ang beteranang talent manager nga si Cornelia Lee nailhan sa kadaghanan isip Tita Angge .

Kahinumduman nga nahiagom og  heart attack  si Angge  niadtong  March 5, 2016  hinungdan usa kini ka tuig  nga nipahuway  na sa trabaho.

Ipahimutang ang  iyang patay nga lawas sa  Arlington Memorial Chapel sa  Quezon City  ug  himoon ang memorial service sa South Cemetery, Makati City, karong March 8 sa buntag. Nagsugod si Angge isip   movie fan ug nahimong talent sa radio, television, ug pelikula.

Naabot  ang panahon nga nahimo siya nga casting director ug talent manager. Pipila sa gihuptan niya nga mga artista mao sila si  Sylvia Sanchez, Smokey Manaloto,ug  Mickey Ferriols.

Nahimo siya nga  presidente sa  fans club sa  King and Queen of Philippine Movies nga sila si  Fernando Poe Jr. ug Susan Roces.

Nahatagan usab siya og break kaniadto sa pelikulang Continental Playboy nga gibidahan ni   Helen Gamboa ug nidala siya isip  turista.

Nakalugwa na usab siya sa pipila ka mga pelikula niadtong  '60s ug '70s , kini sama sa All Over the World, Way Out in the Country, May Tampuhan Pa-minsan-minsan, Sitting in the Park, Pogi, Joaquin, Petrang Paminta, Servillano Zapata, ug Wrong to Be Born.

Loydie ug Ellen nanuroy sa Ilocos

Nag-uban sila si  John Lloyd Cruz ug  Ellen Adarna  sa  pagpanuroy sa Ilocos uban sa ilang barkada sa miaging adlaw. Nitambong usab ang duha  sa  engagement  nila ni Beauty Gonzales ug  Norman Crisologo.

 Kahi-numduman nga  taud-taod na nga natsismis sila si John Lloyd ug Ellen nga matud pa duna’y  espesyal nga tinagdan sa  usa’g-usa apan hugtanon nila kini nga gihimakak.

Una na nga gibutyag ni Ellen nga soud lang gyud niya nga higala si Lloydie busa dili angayan hatagan og malisya ang ilang panaghigalaay. 

JaDine gikagobtan sa Baler

Nag-surfing sa Baler ang mag-uyab nga sila si James Reid ug Nadine Lustre  diin gikagubtan sila. Sa  hulagway sa pipila ka nitizens  nga namantala sa fashionpulis.com,  gidumogan pag-ayo  sa mga tawo sila si James ug Nadine hinungdan nga gialirongan dayon kini og mga escort.

Mahiligon kaayo ang duha sa surfing   ug mohirit gyud sila sa maong butang sa higayon nga maka-bakasyon sila.  

33 ka celebrities ang modagan@

 Mukabat na ngadto sa 33 ka celebrities ang mudagan alang sa labing unang M-Talents Celebrity Run diha sa dakbayan sa Mandaue karong umaabot Marso 25.

Lakip sa maong gidaghanon sa maong celebrities ang mga produkto sa Pinoy Boy Band Superstar nga sila si Tony Labrusca ug James Ryan Cesana, kinsa nagpahayahay diha sa bantugan na kaayong Lavie Parissiene nga nahimutang sa Lahug, human sa ilang corporate show niadtong Huwebes sa gabii. Si Aida Patana, manager sa M-Talents Events & Promotions nagkanayon nga mukabat na ngadto sa 200 ang ilang sponsors nga maoy mupaluyo sa nahisgutan niyang celebrity run, nga giisip nga labing dako nga panagtapok sa mga celebrity alang sa usa ka athletic event dinhi sa Sugbo.

Gumikan niini, walay kabutangan sa kalipay ug walay puas ang pasalamat sa “Tulay ng mga Artista” nga si Aida, gumikan sa paghigugma niya pa sa mga Sugbuanon kaniya nga mabatyagan diha sa nag-awas nga suporta nga iyang naangkon pinaagi niining umaabot nga celebrity run.

Ang maong celebrity run maoy highlight sa 5th anniversary sa M Talents sa paghatag og kalingawan ug pagdala sa labing mga sikat nga artista dili lamang dinhi sa Sugbo kundili sa nagkadaiyang mga dakbayan lukop nasud. Lakip sa mga mudagan  mao sila si Matteo Guidicelli ug Ian Veneracion, diin lakip sa beneficiary mao ang Bagong Buhay Rehabilitation Center ug Mandaue Home for the Kids.

Padayon gihapon ang registration diha sa Parkmall Mandaue City, MTalents office ug Ayala Center Cebu.

Andam mag-artista

Gibutyag sa beauty queen nga si Maxine Medina nga bukas siya sa posibilidad nga mosulod sa showbiz world. Matud pa ni Maxine nga nag-agad ra siya kun duna’y  proyekto  nga itanyag kaniya.  Suma pa ni Maxine nga target niya nga makauban ang mga banggiitang artista aron motakod ngadto kaniya ang abilidad niini sa pag-arte.

Nakig-uban sa fans

Nakighimamat si Maine Mendoza sa pipila niya ka fans atol sa kasaulogan sa iyang 22nd birthday kagahapon. Dako ang utang kabubut-on ni Maine sa mga tawo nga nisuporta sa iyang career ilabi na sa tandem nila ni Alden Richards.

Danita mibalibad

Nibalibad si Danita Paner nga putlan ang iyang buhok hinungdan nga wala nadayon ang iyang paglugwa sa seryeng Wildflower nga gibidahan ni Maja Salvador. Si Roxanne Barcelo maoy gihulip sa karakter nga pagadalhon unta ni Danita,

Rogelia sa Impostora

Malakip si Sinon Loresca sa remake sa Impostora nga pagabidahan ni Kris Bernal.  Nailhan si Sinon sa kadaghanan isip “Rogelia” sa kalyeserye sa Eat Bulaga.  Nahimong viral ang iyang mga video kun diin makita ang iyang pagkiay-kiay samtang naglakaw.

Lisod nga eksena

Tsika pa ni Daniel Padilla nga dili basta-basta ang iyang gibuhat sa pelikula nila ni Kathryn Bernardo nga Can’t Help Falling in Love. Suma pa sa aktor nga duna’y eksena nga niambak siya og lawom nga pangpang.

Shode damay

Nanghinaot si Robi Domingo nga wala unta’y madamay nga laing tawo sa panagbuwag nila ni Gretchen Ho. Una na nga na-link si Robi ngadto sa Korean star nga si Sandara Park apan hugtanon nila nga gihimakak ang maong istorya.

Grabe ang kasakit

Giangkon ni Daniel Matsunaga nga wala pa gyud maalim ang samaran niya nga kasingkasing human sa breakup nila ni Erich Gonzales.  Bisan sakit kaayo ang maong sitwasyon, gihinay-hinay na ni Daniel ang pagsugod sa proseso aron maka-move on.

Hugot song

Sa programang "Umagang Kay Ganda” kagahapon, gikanta sa TV host nga si Gretchen Ho ang pipila ka linya sa awit ni Whitney Houston nga "Didn't We Almost Have It All". Matud pa nga naka-relate pag-ayo si Gretchen sa maong awit ilabi na nga bag-ohay lang sila nga nagbuwag ni Robi Domingo.

Big break kang Yohan

Ang  I Love OPM winner  nga si Yohan Hwang maoy napili nga mokanta sa  Korean version sa  awit ni Yeng Constantino nga  “Ikaw” nga  official theme song sa  Korean drama series nga  Love in the Moonlight.  Giisip  kini ni Yohan nga usa ka dakong break sa iyang career ug nagmalaumon siya nga magsagunson ang iyang mga proyekto. (BANAT NEWS)