Libreng chess tourney sa CPSC sugdan na

CEBU, Philippines - Mosikad na karong adlawa ang binulan nga torneyo sa chess nga pasiugdahan sa Cebu Provincial Sports Commission diha sa Knight Attack Chess Cafe sa Robinsons Galleria Cebu.     Sugdan ang hinashasay sa utok sa alas 10:30 sa  buntag.

Hinuon, ang  mahimong  makasalmot niini kadto lamang mga nag-edad og 15 anyos paubos.

 Puwera na lang sa mga taga dakbayan sa Sugbo, ang maong  kompetisyon abli sa tanang magduduwa og ahedres gikan sa probinsiya sa Sugbo, apil na ang taga Mandaue, Danao, Toledo, Lapu-Lapu, Bogo ug Naga.

Ang makampiyon modawat og P1,500, samtang ang mopahiluna sa ikaduha hangtod sa ikaupat nga puwesto mobulsa og P1,000, P500 ug P300. Kadtong motapos sa ikalima hangtod sa ika-10 dunay konsolasyon nga P200 matag usa.

Libre ang registration kay kabahin man kini sa sports development program sa probinsiya sa Sugbo alang sa chess.

     Ang mga duwa ubos sa superbisyon ni FIDE Arbiter Marvin Y. Ruelan. (BANAT NEWS)