Japinay mihimo'g kasaysayan sa judo

CEBU, Philippines - Ang Japanese-Filipino judoka nga si Kiyomi Sarausad Watanabe mihatag na sab og dungog ug garbo sa Pilipinas sa international nga bantawan, ning higayona sa makasaysayanong paagi.

Kini human si Watanabe, nga No.58 karon sa International Judo Federation world rankings, misakmit og bronze medal sa -63 kilograms category sa IJF Grand Slam Paris 2017 kagahapon didto sa Palais Omnisports de Paris-Bercy sa Paris aron mamahimo nga labing unang atleta gikan sa Southeast Asia nga midaog sa maong prestihiyosong kompetisyon nga kabahin sa IJF Grand Prix series.

Ang 21-anyos nga si Watanabe, nga duha ka higayon naka-gold sa Pilipinas sa SEA Games, mipilde sa inilog nilang mga karibal gikan sa Belarus, China ug Russia sa wala pa siya mapilde ni Clarisse Agbegnenou sa host France.

Si Watanabe mi-away dayon sa repechage bracket diin iyang gipilde si Lucy Renshall sa Great Britain pinaagi sa ippon (full point) gamit ang 'juji gatame' aron pag-angkon sa bronseng medalya.

Gibati og tumang kalipay human masayud sa maayong balita, si Philippine Sports Commissioner Ramon Fernandez mipadangat dayon sa iyang pahalipay ngadto ni Watanabe sa pagkab-ot niini og laing marka sa sanag niyang karera.

"On behalf of the PSC, we would like to extend of congratulations to Miss Watanabe for her historic feat. She edifies the spirit of a true Filipino athlete worthy of emulation. We will assure her of our all-out support as she endeavors to reap more glory for the country in future international competitions particularly in the 2020 Tokyo Olympics," dason pa ni Fernandez.

Si Watanabe, kansang mama nga si Irene Sarausad-Watanabe lumad gikan sa Toledo City, natawo niadtong 1996 dinhi sa dakbayan sa Sugbu diin siya nagdako ug nagtungha sa St. Paul Learning Center. Mibalhin siya sa Japan uban sa iyang inahan ug amahan nga si Shigeru Watanabe niadtong 2004 sa dihang otso anyos pa lamang siya. (EBV)(BANAT NEWS)