“I Love Run: run for the heart” gitakda

CEBU, Philippines - Laing ‘run for a cause’ ang mahitabo sa Sugbo  pinaagi sa “I Love Run: Run for the Heart” sa Pebrero 5 didto sa Axis Courtyard sa  dalan Escario,  ning dakbayan sa Sugbo.

Gipasiugdahan sa Department of Social Welfare and Development (DSWD)   ug  Central Visayas Adoptive Parents Association (CVAPA), ang maong ambisyosong  proyekto  buot  nga motabang sa mga giabandonar nga mga kabataan nga makakita og pinuy-anan pinaagi sa adoption.

Si Concepcion Solera sa DSWD, nagkanayon nga  200 ka mga giabandonar nga mga bata ang anaa karon kanila. Anaa pa’y mga bag-ong himugso ngadto sa mga young adults.

Gawas sa kompetisyon, ang mga partisipante masayod usab sa proseso sa legal adoption tungod kay anaa ang mga representante sa DSWD ug CVAPA sa maong  kalihukan.

Mga kategoriya nga tigian naglakip sa 500m dash, 3K, 5K ug 10K.

Ganting salapi ug  gift certificates ang  nagpaabot sa mga top performers, samtang ang 10K ug 5K finishers makadawat og specially designed finisher’s medal. Ang registration fee nagkantidad og P300 sa 3K, P500 sa 5K ug P500 sa 10K. Ang mga batan-on nga modagan sa 500m dash mobayad lang og P100, samtang ang mga abandoned kids nga buot mosalmot malibre sa registration.  Mahimo nang magparehistro sa Runnr sa Active Zone sa Ayala Center Cebu. (BANAT NEWS)