Spurs mibugha sa Nuggets
CEBU, Philippines - Mipatuasik og 28 puntos si LaMarcus Aldridge, lakip ang 11 niini sa nagbagang third-quarter rally sa dihang gilat-an sa San Antonio Spurs ang Denver Nuggets, 127-99 sa ilang duwa sa NBA kagahapon didto sa Pepsi Center sa Denver, Colorado.
Si Kawhi Leonard midugang og 24 puntos, samtang si Tony Parker mitali og 21 puntos uban ang season-high nga siyam ka assists alang sa Spurs nga miinat sa ilang road games record ngadto sa 17-3 karong season. Gawas ni Aldridge, daw sa nayawaan ang duwa ni Parker kay kausa lamang kini masipyat sa 11 niya ka itsa.
Si Nikola Jokic adunay nuybe puntos ug 11 ka rebounds alang sa Nuggets, nga nahisukamod sa ikaupat nga sunod-sunod ka higayon.
Didto sa Houston, si James Harden miratsada og 26 puntos, samtang si Nene milansang og duha ka free throws sa nahabilin nga 0.7 segundo sa duwa aron paggiya sa Rockets ngadto sa kulbahinam nga 118-116 nga daog batok sa Oklahoma City Thunder.
Nakasugakod ang Rockets bisan pa man sa pagpabuto ni Russell Westbrook og 49 puntos dayon na ngadto sa pagkulit sa ikaunom nilang sagunson nga daog.
Sa dihang nagtabla ang iskor, 116-all, si Nene gi-foul ni Jerami Grant ug dayon kalmado kining mipasud sa iyang free throws aron silyohan ang daog sa Rockets. Samtang ang Thunder nahagsa sa ikatulong sunod-sunod nga duwa. (BANAT NEWS)
- Latest
