Hardaway, McCollum nag-wild

CEBU, Philippines - Naghudyaka atol sa Bag-ong Tuig sila si C.J. McCollum ug Tim Hardaway Jr. human sila mipabuto og career-high nga maoy nahimong yawi sa kadaugan sa tagsa-tagsa nila ka mga koponan.

Si McCollum mikulit og career-high 43 puntos sa dihang gitumba sa Portland TrailBlazers ang Minnesota Timberwolves sa iskor nga 95-89, samtang si Hardaway mikadlit og 29 puntos aron pagtuboy sa Atlanta Hawks ngadto sa kulbahinam nga kadaugan, 114-112  sud sa overtime batok sa San Antonio Spurs.

“Obviously, C.J. had an outstanding game,” matud pa ni Portland coach Terry Stotts agi’g pagdayeg ni McCollum nga grabe ang pagpangigo human mipasud og 16 sa 25 niini ka itsada.

Ang TrailBlazers alkansi og 12 puntos sa halftime, apan milusad og 14-2 run aron pagtabla sa iskor, 51-all, sa wala pa iloga ang labaw sa hingpit, 69-64 sa katapusang kuwarter.

Wala na sila molingi pa sukad niadto.

Si Andrew Wiggins mihipos og 24 puntos, apan siya ug silang Karl-Anthony Towns ug Zach LaVine nalimitahan lamang ngadto sa 48 human nagkumboya’g 73 puntos batok sa Milwaukee Bucks niadtong Sabado.

Didto sa Atlanta, si Hardaway maoy nahimong bida sa dihang gipakgang sa Hawks ang 11 ka sunod-sunod nilang pilde sa Spurs atubangan sa 18,000 ka bibo kaayo nilang fans.

“Once you make one and then make another one, everything seems to come. We came out today and played with a lot of pride,” matud pa ni Hardaway nga mipasud og 21 puntos sa second half ug otso sa overtime.

Gawas ni Hardaway, mihimo sab og kasikas si Paul Millsap nga mipabuhagay og 32 puntos uban ang 13 ka rebounds ug tulo ka assists sa Hawks.

Sa lain pang mga duwa, si Myles Turner miratsada og 23 puntos uban ang 12 ka rebounds aron pagpangu sa Indiana Pacers  nga mipukan sa Orlando Magic sa iskor nga 117-104, samtang sila si Kyle Lowry ug DeMar DeRozan nagkumboya’g 72 puntos sa dihang gipilde sa Toronto Raptors ang Los Angeles Lakers, 123-114. (BANAT NEWS)