Mills misalbar sa Spurs

CEBU, Philippines - Si Patty Mills nanginit human gibunlot sa ilang bench aron pagtapos og 23 puntos nga maoy nahimong hagdanan sa San Antonio Spurs pagkab-ot sa 94-87 nga kadaugan batok sa Dallas Mavericks sa NBA kagahapon.

Mipupo si Mills og 15 puntos sa katapusang kuwarter, apil na niini ang sagunson nga walo ka puntos nga maoy nakapalabaw sa Spurs sa hingpit, 90-84.

Gawas ni Mills, daku sab og natabang si Kawhi Leonard nga mihabwa og 18 sa iyang 28 puntos sa second half.

Ang Spurs miduwa nga wala ang mga bitoon nilang sila si Pau Gasol, Manu Ginobili ug Tony Parker nga  wala  pasudla   ni   coach Gregg Popovich aron makapahuway gikan sa duha ka sunod-sunod nga duwa.

Ang Mavs migamit og 15-0 run aron pagposte og 13 puntos nga labaw sa ikatulong kuwarter, 60-47, apan madasigon nga mibangon ang Spurs gumikan sa pagtambayayong nilang Mills ug Leonard.

Sa laing aksiyon, si Russell Westbrook mihimo sa ikaupat niyang sunod-sunod nga triple-double alang sa Oklahoma City Thunder nga mipakugang  sa Washington Wizards sud sa overtime, 125-115.

Si Westbrook migaling og 35 puntos, 14 ka rebounds ug 11 ka assists alang sa ikasiyam niyang triple- double karon nga  season ug ika-46 sa kinatibuk-an sa iyang karera.

Si Victor Oladipo mitapos og 25 puntos, samtang si Enes Kanter miamot og 14 sa Thunder  nga nagbitbit na karon og 12-8 nga baraha.

Samtang ang New York Knicks miguba sa mabulukong gabii ni Karl Anthony Towns human ilang gipukan ang Minnesota Timberwolves, 106-104.

Si Carmelo Anthony maoy nahimong bayani sa Knicks human mipasud sa iyang tira sa nahabilin nga 2.3 segundos.

Si Towns mihimo og career-high 48 puntos ug 18 ka rebounds, apan nakawang ang iyang paningkamot kay napukan ang  Timberwolves. (BANAT NEWS)