CEBU, Philippines - Naghudyaka ang mga Maasinhon human ang katagilungsod nilang si Adones Aguelo mihimo og impresiyon sa ilang atubangan sa dihang gipatikangkang si Rodel Wenceslao sa ikalimang hugna aron madepensahan ang iyang Asian Boxing Federation lightweight title niadtong Biyernes sa gabii didto sa Maasin City, Southern Leyte.
Segun sa taho ni Maloney L. Samaco sa PhilBoxing.com, si Wenceslao maoy unang nanginit, apan sa dihang nakuha na ni Aguelo ang iyang pulso, nakabawi siya sugod sa ikaduhang hugna diin siya nakalandig og solidong kombinasyon. Hingpit nga gitapos ni Aguelo ang away sa ikalimang hugna diin siya milusad og rapidong suntok ngadto sa tiyan nga maoy nakapahagba ni Wenceslao. Sa dihang giiphan, wala na makabarog pa ang gikutasan nga si Wenceslao hinungdan nga giundang ni reperi Tony Pesons ang away sa oras nga 1:15 sa ikalimang hugna. Si Aguelo nagbitbit na karon og 27-15-2 record uban ang 19KOs, samtang si Wenceslao nakatilaw sa ika-13 niining pilde sa 25 ka away.
Sa iyang bahin, si matchmaker Willie Flores nagkanayon nga sunod nilang lihukon mao ang pagpaaway ni Aguelo alang sa GAB Philippine title. (BANAT NEWS)