D’ Boyz mibaraw sa Ac Troopers sa LABA

CEBU, Philippines - Gipamuslan sa D’ Boyz ang luag nga   depensa sa AC Troopers aron moiskor og makabungog nga kadaugan, 83-69 sa LABA President’s Cup Second Conference basketball tournament niadtong Biyernes didto sa Barangay Banilad gym, dakbayan sa Mandaue.

Naglisud pa ang D’ Boyz sa first period nga miresulta sa ilang pagkalubong, 7-15 sa kapin tres minutos ang nahabilin sa maong kuwarter.

Dihang nakatabla sa iskor, 29-all sa nahabiling 3:39 sa second quarter,   ang  D’  Boyz  mihinay-hinay na  og kamang sa unahan diin didto ilang gipamuslan ang huyang nga depensa sa AC Troopers hinungdan nga nakatala sila sa labing daku nila nga labaw, 58-38 atol sa third quarter.

Bisan og klaro na ang ilang kadaugan, ang D’ Boyz wala gyud mohunong sa pakigbisog hangtod nahurot ang oras sa duwa.

Si Rey Gonzaga maoy topscorer sa D’ Boyz nga mipabuhagay og 20 puntos uban ang lima ka rebounds, samtang ang team manager nga si Jason Pestaño ug Ebyong Ouano mipatarok og 10 puntos matag usa.

Ang AC Troopers ni P/Insp. Dondon Coloscos gipangulohan ni Opong Englis pinaagi sa iyang 10 puntos ug 10 sab ka rebounds.

Sa laing aksiyon, ang New Millennium Hardward nilang coach Lou Ornopia ug Gilbert Sebandal mihakot na sab og daog batok sa Butch Surveying, 84-65.

Upat ka players sa New Millennium Hardware ang miiskor og double figures pinangulohan ni Canjo Echavez nga mikulit og 17 puntos. Si Tawing Grafe miamot og 14 puntos, samtang sila si Adie Cinco ug Ariel Ocier mitimbre’g  11 ug 10 puntos.

Nangu sab sa Butch Surveying ni Engr. Butch Migriño mao si Ronald Llanos sa iyang 13 puntos, gisundan ni Banjo Hatamosa nga adunay 10 puntos.

Bisan giunsa  ni coach Rudy Candelada ug sa team captain niining si  Tony Alcover pagladlad og mga diskarte, wala gyud mosalir ang mga paningkamot sa Butch Surveying  batok sa mas kusgan ug paspas nga D’ Boyz hinungdan sa ilang kapildihan. Ang mga duwa ubos sa superbisyon ni commissioner  Albert ‘Obeth’ Ramos inabagan nilang Lloyd Chavez ug Willy Medillo.

Puntos matag usa

Unang duwa:

New Millennium Hardware (84) – Echavez 17, Grafe 14, Cinco 11, Ocier 10, Pacquiao 9, Sebandal 5, Chavz 5, Ejercito 4, Ranile 3, Rogado 2, Asis 2, Incorporado 2.

Butch Surveying (65) – Llanos 13, Hatamosa 10, Bukiron 9, Gelbolingo 8, Catinoy 6, Abarquez 6, Medillo 4, Magale 4, Anghay 2, Adolfo 2, Ramirez 2.

Ikaduhang duwa:

D’ Boyz (83) – Gonzaga 20, J. Pestaño 10, E. Ouano 10, Gomez 8, Delima 7, Catinoy 6, Colanse 6, D. Pestaño 6, M. Ouano 4, Obsequias 2, Malazarte 2, Rensen 2.

AC Troopers (69) – Englis 10, Coloscos 8, Velasco 8, Comiso 8, Ferolino 7, Cabahug 6, Dakay 6, Surban 5, Migallen 4, Monsanto 4, Beldera 2, Saldua 1. (BANAT NEWS)