CEBU, Philippines - Mo-host na sab ang Sugbo sa labing premyadong off-road triathlon event sa kalibotan sa XTerra Philippines Championship didto sa Danao City sa Abril 23 sunod tuig.
Ang Cebu ni-host sa XTerra Philippines lima ka tuig na ang milabay didto sa Liloan, apan gibalhin kini didto sa Albay sa miaging tuig. Ang Albay unta gihapon ang mo-host sa 2017 edition, apan si Albay governor Alfrancis Bichara mibalibad na nga ipadayon ang kontrata uban sa Sunrise Events Inc.
Si SEI general manager Princess Galura mipahibalo nga selyado na ang kasabotan tali kanila ug ni 5th District Representative Red Durano alang sa hosting sa Danao.
Si Danao City administrator Oscar “Boying” Rodriguez, sa iyang bahin, miingon nga andam sila kanunay alang sa pag-host og dagkung sporting event sama sa XTerra.
Gawas sa off-road triathlon, si Galura midugang nga mopahigayun usab sila og duathlon competition alang sa XTerra Danao aron kahatagan og kahigayonan ang mga Cebuano athletes nga makalumba bisan pa og dili sila ganahan moapil sa swimming event.
Ang registration alang sa 2017 XTerra sa Danao magsugod karong Oktubre 26. (BANAT NEWS)