UV, USC sugod na sa ilang final ‘Rematch’

CEBU, Philippines - Sugdan na sa defending champions University of San Carlos (USC) Warriors ug University of the Visayas  (UV) Green Lancers  ang ilang dumot nga “rematch”  sa Game-1 sa ilang “best-of-five” finals series alang sa 16th Cebu Schools Athletic Foundation, Inc. collegiate basketball title karong adlawa diha sa Cebu Coliseum.

Ang Warriors ug ang Lancers magkumbati sa alas-5:45 sa hapon, human sa bugno tali sa Southwestern University-Phinma Cobras ug University of San Jose-Recoletos Jaguars sa Game-1 sab sa ilang best-of-three series alang sa ikatulong dapit.

Si UV basketball team manager Gerald Anthony ‘Samsam’ Gullas Jr. sa sayo pa mibahad nga dili sila moduwa sa finals hangtod nga mohimo og  makuting imbestigasyon sa dili maayong insidente nga ilang nasinati sa ilang locker room atol sa ilang duwa batok sa Warriors niadtong Huwebes sa gabii.

Sa wala pa magsugod ang duwa, si UV coach Gary Cortes ug ang iyang mga players dunay nakit-an nga mura’g hulga nga mensahe nga sinulat sa pulang tinta sa dakung samin sud sa ilang locker room nga nag-ingon: “Ayaw mo papilde ha. Please!!!”

Sila si Gullas ug   Cortes mibasa niini isip usa ka seryosong hulga batok sa ilang team ilabi na kay duna na may espekulasyon nga tuyo magpapilde ang UV sa USC aron sirad-an ang pultahan sa SWU ngadto sa kampiyonato.

Tuod man ang Warriors mipatigbabaw sa iskor nga 72-65 aron pagduso og finals rematch batok sa Lancers ug sa susamang higayon gitagak ang Cobras.

Apan si Gullas miinsister nga napilde sila sa maayong team ug ang mobigay sa usa ka duwa wala sa ilang sistema ilabi na kay duna sila’y personal nga garbo nga giampingan ug imahe nga giampingan basi sa legasiya nga ilang natanom sud sa milabay’ng katuigan.

Kabahin sa nahitabo sa ilang locker room, si Gullas miawhag sa mga awtoridad paglusad og imbestigasyon aron ang insidente dili mamahimong sumbanan sa mga krusyal nga duwa sa liga sa umaabot.

“I will not let them play Game 1 up until a thorough investigation has been done by CESAFI on who's behind this cowardly act. This is a grave threat and I will not allow my players to be in danger. We will not play any championship game up until CESAFI will figure out what happened,” dason pa ni Gullas sa iyang Facebook page.

Nausab ra hinuon dayon ang desisyon ni Gullas human makigkonsulta sa iyang mga higala inubanan sa pasalig ni CESAFI commissioner Felix ‘Boy’ O. Tiukinhoy Jr. nga mopakatap kini og dugang sakop sa mga kapolisan aron bantayan ang seguridad sa Lancers.

Mao kini ang ikaduhang sunod-sunod nga higayon nga mag-abot ang UV ug USC sa finals.    Sa miaging season, misalida sila sa makasaysayanong “best-of-five” series din ang Warriors nga gidala kanhi ni coach Rommel Rasmo, miguwang mananaog sa kulbahinam nga Game-5 aron paglangkat sa labing una nilang major basketball title sud sa 58 ka tuig. (BANAT NEWS)