Torre naka-bronze sa Chess Olympiad

CEBU, Philippines - Sa edad nga 64-anyos, gipakita ni Eugene Torre nga wala gihapon mibahar ang iyang abilidad sa pagduwa og ahedres.

Kini human ang labing unang chess Grandmaster sa Asya milangkat og bronze medal nga nakaduslit og gamay’ng kahayag sa mangitngit nga kampanya sa Pilipinas sa bag-ohay pang natapos nga 42nd World Chess Olympiad didto sa Baku, Azerbaijan.

Si Torre mitak-op sa iyang kampanya pinaagi sa pagpukan ni International Master Moulthun Ly sa Australia aron pagtapos nga wa’y pilde sa 11 ka duwa. Mikulit siya og 10 puntos human midaog siyam ka higayon ug tabla sa duha ka duwa.

Ang iyang iskor maoy labing daku sa torneyo, apan si Torre naka-bronze lamang gumikan kay segun sa bag-ong format sa torneyo. Pasidunggan ang mga mananaog basi sa labing taas nga performance rating.

Si GM Wesley So, ang kanhi teammate ni Torre nga  nagrepresentar na karon sa Amerika, maoy milabni sa bulawang medalya uban sa iyang performance rating nga 2896. Ang silver napunta ngadto ni Hungarian GM Zoltan Almasi nga mitala og 2845 nga performance rating, mas taas og nuybe puntos ni Torre.

Mao kadto ang labing unang medalya ni Torre sukad siya naka-silver sa 1974 Nice Olympiad sa France diin siya nahimong labing unang GM sa Asya.

Sa kinatibuk-an, ang Pilipinas mitapos sa ika-58 nga puwesto nga maoy labing bati niining salida sa torneyo nga ipahigayon kausa lamang sud sa duha ka tuig. (BANAT NEWS)