DBTC hagba na SAB

CEBU, Philippines - Si Harvey Sanchez mikadlit og 17 puntos, apil na niini ang krusyal niyang 3-pointer nga maoy nagtuboy sa Cebu Eastern College Dragons ngadto sa kulbahinam nga daog batok sa Don Bosco Technology Center Greywolves, 63-60 sa juniors division sa 16th Cebu Schools Athletic Foundation, Inc. men’s basketball tournament kagahapon didto sa Cebu Coliseum.

Ang bitoon nga sentro nga si James Tempra midugang og 16 puntos alang sa Dragons, kansang opensa maayo ang dagan gikan sa sinugdanan dayon na ngadto sa pagposte og nuybe puntos nga labaw human sa ikatulong kuwarter, 49-40.

Ang Greywolves miresbak pinaagi sa paglusad og 12-3 run aron pagtabla sa iskor, 52-52  sa nahabilin nga 3:56 sa duwa. Human nakapasud sa iyang itsa si Jean Bañez, si Sanchez milansang og 3-pointer ug dayon si Tempra nakaiskor pinaagi sa lay-up nga maoy nakapabalik og labaw sa Dragons, 59-54.

Human nakasikit sa iskor nga 60-61 sa basket ni Grenal Malubay, ang Greywolves dunay pipila ka higayon nga ilogon ang labaw, apan pakyas gumikan sa duha ka sunod-sunod nga turnovers nga maoy nakapahagba nila.

Sa dihang gi-foul atol sa penalty situation, si Dave Manlapat yanong mipasud sa duha niya ka free throws sa nahabilin nga siyete segundos aron pagtukmod sa Dragons sa ikaupat niining daog sa pito ka duwa.

Si Alje Mendez mitapos og 15 puntos, samtang sila si Ken Gato ug Malubay nagkumboya’g 21 puntos alang sa Greywolves nga nasugamak sa ikaduha niining sunod-sunod nga pilde human mitali og impresibong 4-0 record. (BANAT PALARO)