Phinma/SWU 3rd sa Partner's Cup

CEBU, Philippines - Si Mark Jayven Tallo milansang og krusyal nga 3-pointer sa nahabilin nga 1.7 segundo sa duwa aron pag-aswat sa Phinma/Southwestern University Cobras ngadto sa kulbahinam nga daog batok sa Highlands Corned Beef/University of Cebu Webmasters,  62-59  ug ingon man pagsakmit sa ikatulong dapit sa 8th Cebu Schools Athletic Foundation, Inc. (CESAFI) Partner’s Cup kagabii didto sa Cebu Coliseum.

Ang ‘back-to-back’ CESAFI MVP mitapos og 13 puntos, samtang si William Polican miratsada og 18 puntos, apil na niini ang sagunson niyang sayes puntos nga  mihaling sa opensa sa Cobras sa ikatulong kuwarter.

Ang Webmasters maoy abante sa halftime, 31-27, apan human nakatabla ang Cobras, 39-all, si Polican mipasiugda og 8-0 run nga   nakapaabante  sa SWU og   otso puntos.

Pabiling nanginit ang Cobras hinungdan nga nainat ang ilang labaw ngadto sa 11 puntos, 56-45, apan ang Webmasters milusad og mainit nga 14-3 run aron pagtabla sa iskor, 59-all sa nahabilin nga 22 segundos.

Apan wala na mitugot pa ang Cobras nga moresulta ang duwa ngadto sa overtime pinaagi ni Tallo nga kalmado kaayong milansang sa iyang three-point shot nga maoy nakabuak sa dughan sa Webmasters. (BANAT PALARO)