Warriors, Thunder magtiwas

CEBU, Philippines - Seguradong kulbahinam ug eksplosibong aksiyon ang masaksihan sa kinabag-an sa dihang magtiwas ang Golden State Warriors ug ang Oklahoma City Thunder sa tinaktakay nga Game-7 sa NBA Western Conference finals karong buntag didto sa Oracle Arena sa Oakland, California.

Ang Thunder maoy unang mipadanak og dugo, apan dali nga nakabawos ang Warriors aron pagtabla sa best-of-seven series sa baraha nga 1-1 didto sa ilang balwarte.

Human gilampaso duha ka higayon sa Thunder sa Games 3 ug 4 nga naghulog kanila ngadto sa 1-3 nga biya, ang Warriors mipakita sa kasingkasing sa tinuoray nga kampiyon human ilang giharos og daog ang sunod nga duha ka duwa, apil na niini ang makapaisag balhibo nga 108-101 desisyon sa Game- 6 didto sa Oklahoma aron pagpuwersa og Game-7.

Bisan og sila maoy inilog kay adto man ang duwa sa ilang tugkaran, ang Warriors nangagpas og malisud nga hagit nga ilusad sa Thunder batok kanila.

“It’s going to be a hard game. If we thought tonight was hard, Game 7’s going to be even tougher,” matud pa ni Warriors superstar nga si Curry.

“Everybody on both sides of the ball is going to leave it all out on the floor. It's win or go home. So we can't expect just because we’re at home that we can just show up and win,” dugang pa sa back-to-back MVP.

Ang alas sa Thunder nga si Kevin Durant madasigon kaayo nga manulong sila sa teritoryo sa ilang kontra gumikan kay alang niya, daku kini nga oportunidad alang kanila. (BANAT PALARO)