Worthy/UV, 5-0 na sa Partner’s Cup

CEBU, Philippines - Ang Worthy/University of the Visayas Green Lancers mikolapso sa ikatulong kuwarter, apan nagsalig kini sa eksplosibong performance ni Tristan Albina sa endgame aron pagpakgang sa My Led Opto/Cebu Institute of Technology-University Wildcats, 73-69  ug pagpabiling wa’y pilde sa 8th Cebu Schools Athletic Foundation, Inc. (CESAFI) Partner’s Cup kagahapon sa Cebu Coliseum.

  Alkansi og kuwatro puntos sa halftime, 35-39, ang Wildcats nanginit sa ikatulong kuwarter diin sila milabaw og 10 puntos duha ka higayon, ang katapusan sa iskor nga 57-47 gumikan sa pagtambayayong nilang Frederick Brigoli, Marlo Pono ug Wilkin Sanchez.

Apan dali nga miresbak ang UV. Human sa butter-beater ni Jerome Napao, si Albina mura’g nayawaan human kini mitali og 10 ka sunod-sunod nga puntos sa nagbagang 17-1 rally nga nakapaabante sa Lancers og nuybe puntos, 69-60 sa nahabilin nga 3:41 sa duwa.

Sila si Anthony Lucena ug Sanchez mitali og kuwatro puntos nga nakapukaw sa Wildcats, apan uwahi na ang tanan.  Nakasikit sila sa katapusang higayon sa iskor nga 69-72 gumikan kay si Rey Suerte milansang og usa ka free throw aron pagselyado sa kadaugan sa Lancers.

Si Albina mikulit sa tanan niyang 11 puntos sa katapusang hunat sa duwa. Si Joshue Segumpan mitapos sab og 11 puntos, samtang si Napao miamot og 10 sa Lancers nga mipahugot sa ilang pagkupot sa liderato bitbit ang baraha nga 5-0.

Si Rey Navarro dunay 19 puntos, samtang si Lucena mikamada og 15 puntos alang sa Wildcats  nga nakatilaw sa ikaupat nilang pilde nga giatbangan og usa lamang ka daog. (BANAT NEWS)