Beermen moilog sa no. 1 spot

CEBU, Philippines - Ang San Miguel Beermen mosuway pag-ilog sa no. 1 spot sa  PBA Commissioner’s  Cup nga gihuptan karon sa Meralco Bolts.  

Tuyo sa  Beermen  nga moposte og 8-3 record nga motabla kanila sa Meralco. Kun mahitabo kini, ang Beermen ang mosaka sa unang dapit sa standing tungod   kay napilde nila ang Meralco sa sayong bahin sa elimination round.

Hinuon, ang Beermen mag-atubang og lisud nga misyon sa ilang pakigsangka batok sa Tropang TNT  nga gikatakda   karong alas-7 sa gabii  didto sa Smart Araneta Coliseum.

Sa dili pa sila mag-abot, magsangka una ang Alaska Aces ug NLEX Road Warriors   sa pasiunang duwa sa alas-4:15 sa hapon.  

Miabli ang kahigayonan sa Beermen nga makuha ang No.1 sa hinapos na nga elimination round dihang  napilde ang Bolts sa Barangay Ginebra San Miguel niadtong Miyerkules.

Determinado   ang Tropang TNT (6-4) nga ilang mapukan  ang San Miguel ilabi na nga gikan sila sa upat ka sunod-sunod nga daog  human nila  gipangbihag ang NLEX, Ginebra, Rain or Shine Elasto Painters ug Mahindra Enforcer.

Paningkamuton sa Tropang TNT nga modaog tungod kay ang kapildihan mobutang kanila sa ikapito o ikawalong dapit diin kinahanglan nila nga modaog og kaduha sa quarterfinals batok sa No. 1 o No.2 seed. (BANAT NEWS)