Slaughter nag-una sa BPC race
CEBU, Philippines - Ang Sugbuanong sentro nga si Greg Slaughter maoy nag-unang kandidato alang sa “Best Player of the Conference” sa nagpadayong PBA Commissioner’s Cup.
Si Slaughter daku og labaw sa ubang kandidato alang sa BPC award tungod sa nindot niyang performance uban sa Ginebra diin nag-average siya og 19.14 points ug 10.71 rebounds.
Sa mga milabay’ng conference ilabi na sa miaging All-Filipino Cup, si San Miguel Beermen star June Mar Fajardo ang kanunay nga migawas nga labing dominante, apan ning higayona nabiyaan siya sa kanhi niya karibal sa CESAFI nga si Slaughter.
Nagsunod ni Slaughter ang duha ka premyadong guwardiya nga sila si Tropang TNT star Jayson Castro ug Calvin Abueva sa Alaska Aces. Si Castro kinsa gihamok og injury nag-average og 20.86 points, samtang si Abueva anaa sa ikatulo sa iyang 16 puntos matag duwa uban ang 8.12 ka rebounds.
Biya kaayo ang GlobalPort Batang Pier scorer nga si Terrence Romeo ug kuli na nga makaapas pa alang sa BPC award human mikunhod ang iyang produksiyon sa opensa tungod sa injury. Nag-average siya og 25.3 points sa sayong bahin sa conference, apan mipahuway tungod sa injury.
Ang reigning MVP nga si Fajardo taas pa og apason sa ginukdanay alang sa BPC award diin igo lang siya mi-average karon og 11.2 points ug 6.8 rebounds.
Sa laing bahin, sila si Tyler Wilkerson sa San Miguel ug Arinze Onauko sa Meralco maoy sikit kaayo sa karera alang sa Best Import award. (BANAT NEWS)
- Latest
