CEBU, Philippines - Gipukan sa Angel Mary Pawnshop ug D&L Tailoring ang tagsa-tagsa nila ka kaatbang aron moabante sa finals sa 8th F. Llamas Youth Association (FYA) basketball tournament niadtong Huwebes didto sa sitio Manggahan open court sa Barangay Punta Princesa, dakbayan sa Sugbo.
Dili tiaw ang kakurat sa topseeded nga Angel Mary Pawnshop dihang nahulga sila’g maayo sa Car Door & Aircon sa wala pa sila hingpit makaipsot, 91-88 aron maangkon ang unang luna sa finals.
Gipangulohan ni Angel Mary Pawnshop team owner McLain Alkunio ug Ryan Villaver ang kadaugan nga parehong miiskor og 18 puntos. Si Jim Rara miamot og 16 puntos, samtang laing duha ka teammates ang mihimo sab og double figures. Silang James Montiadora maoy nangu sa opensa sa Car Door & Aircon sa iyang 15 puntos, samtang silang Baeng Medalle ug Ranel Pataleta miamot og 14 puntos matag usa.
Si Lito Miraol miabuno og 11 puntos ug si Junrey Arrelgo adunay 10 puntos alang sa Car Door & Aircon.
Sa main game, ang D&L Tailoring yano kaayong misud sa finals human nila gilubong ang Simple Likes Resto Bar, 96-77.
Si Dandan Enriquez mikulit og 18 puntos alang sa D&L Tailoring, samtang si Victor Lastomen adunay 16 puntos. Sila si Dodong Trangia ug Mac Encarguez miabuno’g 13 ug 12 puntos.
Si Giovanni Canceko mihimo’g 25 puntos aron pangulohan ang napildeng Simple Likes, gisundan ni Pablo Cueme sa iyang 16 puntos. (BANAT NEWS)