Naga andam sa CVIRAA

CEBU, Philippines - Siyento porsiyento na nga andam ang dakbayan sa Naga alang sa ilang pag-host sa Central Visayas Regional Athletic Association (CVIRAA) karong Domingo.

Mao kini ang gitug-an ni Naga City Mayor Valdemar Chiong sa Banat News kagahapon. Apan si Chiong mipahibawo nga gusto nila nga maduwa ang tanang event sa ilang  siyudad, apan wala gyud kini gitugot sa kahigayonan gumikan usab kay wala pa mahuman ang ilang Olympic size nga swimming pool.

Asoy pa niya ang swimming  anha himuon sa Cebu City Sports Center (CCSC), samtang ang baseball ug gymnastics   sa lungsod sa Minglanilla.

Nagkanayon si Chiong nga  kini maoy labing una nga higayon nga diha sa   Naga ipahigayon ang CVIRAA  diin migahin  sila og P8.3 milyones  gikan sa Special Education Fund (SEF).

Ang daku nga gahin sa pundo nga gitagana mao ang pagpalit sa mga kagamitan sa paugnat sa kusog.

Si Supt. Senen Paulin, Naga City Division School Superintendent nagkanayon nga mapasalamaton kaayo sila sa kagamhanan sa Naga nga gipangulohan ni Mayor Chiong tungod sa grabeng suporta niini nga gihatag.

Asoy pa niya dili lang sila sa Department of Education ang naningkamot nga mahimong malampuson ang CVIRAA kun dili lakip na ang kapolisan, barangay tanod, city disaster risk reduction office ug uban pa.

Gipanglantawan ni Mayor Chiong nga sa mga mosunod nga katuigan, ang Naga mo-host na sa Palarong Pambansa.

Sa laing bahin,   hinay-hinay na nga nangabot ang mga delegado alang ning usa ka semana nga kompetisyon.  Gipaabot nga mokapin sa sayes mil ka mga indibidwal ang motambong sa maong kalihukan. (BANAT NEWS)