J. Espina sud sa semis

CEBU, Philippines - Hingpit nang nakasud sa semis ang J. Espina Wildcats human ilang gipukan ang USPF Panthers, 83-79 sa 1st Capt. Raul Cabanero Inter-collegiate basketball tournament niadtong Domingo didto sa Bulacao Sports Complex sa Talisay.

Upat ka players sa J. Espina ang miiskor og double figures pinangulohan ni Joshua dela Cerna  sa iyang game-high 29 puntos.  Si Jose Pono miambit og 15 puntos, si Steven Bucao mitimang og 11 puntos ug si Mark Christian Kong mitimbre’g 10 puntos.

Higpit  kaayo ang depensa nga gipatuman sa J. Espina hinungdan nga si Lyndon Colina lang ang nakaiskor og double figures alang sa USPF nga adunay 16 puntos.

Sa laing aksiyon, ang Upper Central nakaipsot sab sa kulbahinam nilang duwa batok sa Sitio Kabanayan, 60-56  sa Inter-sitio division ning maong liga nga nahimo sa paningkamot ni Talisay City ABC president ug Bulacao Brgy. Capt. Raul Cabanero inabagan sa iyang mga konsehales nga adunay dakung papel sa maong liga nga silang Banjo Abastillas, Darwin Cabanero ug Agnes Lastimosa. Gisuportahan sab ang maong liga sa Bulacao Barangay Council ug sa SK Task Force. (BANAT PALARO)