Pondoyo abante sa McDo chess finals

CEBU, Philippines - Si Chris Aldritz Pondoyo ug lain pang 11 ka players miabante ngadto sa monthly finals sa McDonald’s Jones Cup Chess Championships didto sa McDonald's-Jones branch.

Nakatabla lamang si Pondoyo batok ni Adrian Basil Basilgo sa katapusan niyang duwa, apan siya gihapon maoy midominar sa unang hugna sa eliminasyon bitbit ang 5.5 puntos.

Nakigduyog kaniya sa final round ubos sa 14-17 age group mao sila si Nathaniel Nahryl Berdon, Marc Bryan Villarojo, Basilgo, Vic Glysen Derotas ug Lyan Portes.

Sa 13-under category, mi-qualify sa finals mao sila si Rejel Clyde  Perandos, Arje Villarin, Jervy Villarin, Raniel Jay Perandos, Angel Naureen Bagano ug Ivy Jocyl Javagat.

Ang ikaduhang hugna sa eliminasyon gikatakda karong Enero 30. Ang kampiyonato banatan dayon sunod adlaw diin ang mga mananaog makadawat og medalya, gift certificates ug ganting salapi.  (BANAT NEWS)