CEBU, Philippines - Napunta gyud ang Gilas Pilipinas sa gikahadlokan nga “Group of Death” alang sa Olympic qualifier tournament sa Hulyo ning tuiga didto sa Mall of Asia Arena.
Sa gipahigayong ‘draw’ kagahapon didto sa Switzerland, ang Gilas nabutang sa bracket sa mga powerhouse teams nga France, Canada ug Turkey uban sa New Zealand ug Senegal.
Ang France maoy ranked No. 5 sa FIBA ranking ug gibidahan sa mga NBA stars sama nila ni Tony Parker ug Boris Diaw sa San Antonio Spurs ug Nic Batum sa Charlotte Hornets.
Sa ilang bahin, ang Canada moparada usab sa ilang line-up nga pangulohan ni reigning Rookie of the Year Andrew Wiggins sa Minnesota Timberwolves ug Tristan Thompson sa Cleveland Cavaliers.
Dili usab kabintahaan ang Turkey nga usa sa mga lig-ong puwersa sa European basketball tungod sa presensiya sa mga NBA stars nga sila si Ersan Ilyasova sa Detroit Pistons ug Omer Asik sa New Orleans Pelicans.
Ang mga koponan nga gitan-aw diin daku’g chance modaog ang Gilas mao ang New Zealand ug Senegal nga ilang gipilde sa 2014 FIBA World Cup.
Ang Olympic qualifier nga mahitabo sa Manila sa Hulyo usa lang sa tulo ka mga qualifiers. Ang ubang koponan gibahin-bahin didto sa Italy ug Serbia.
Ang mga magsangka didto sa Italy mao ang Greece, Mexico, Iran, Tunisia ug Croatia, samtang ang Serbia leg ilogan sa host team Serbia, Angola, Puerto Rico, Japan, Czech ug Latvia.
Usa lang ka koponan ang modaog sa matag leg diin moabante sila sa 2016 Rio Olympics sa Agosto didto sa Brazil. (BANAT NEWS)