CEBU, Philippines - Ang Sugbuanong si Zethley Mae Alferez maoy bugtong player sa dul-an sa 200 ka mga entrante nga nahimong double champion atol sa Cebu leg sa 10th Cebuana Lhuillier Age-Group Tennis Tournament nga natapos niadtong Martes didto sa CitiGreen Tennis Resort sa Punta Princesa dakbayan sa Sugbo.
Human giharos og daog ang iyang mga duwa sa elimination ug semifinals didto sa Alta Vista Golf and Country Club, si Alferez mitabok ngadto sa CitiGreen diin siya pabiling nanginit aron pagpakyaw sa titulo sa girls 16 ug 18.
Unang miduwa si Alferez sa girls 16 diin iyang gipakuratan ang topseed nga si Carlyn Bless Guardo sa Isulan, Sultan Kudarat sud sa tulo ka sets, 7-6, 2-6,10-7.
Human sa duha ka oras nga pahuway, nag-abot na usab silang Alferez ug Guardo alang sa korona sa girls 18. Sa maong duwa yano kaayong giitsapuwera ni Alferez si Guardo sud sa duha ka sets, 6-2, 6-2.
Sa laing bahin, mga Sugbuanon sab ang nangharos sa doubles pinaagi nilang Shyne Villareal ug Kristin Renee Salimbangon, Christopher Enriquez ug Francis Hidalgo sa 18-under category ug Cesar Kristofer Salimbangon ug Venz Anton Alforque sa boys 14. (BANAT NEWS)