Cebuana LhuIllier netfest mosikad na

CEBU, Philippines -  Miabot ngadto sa 178 ka netters ang mopakita’g aksiyon sa 1st leg sa 10th Cebuana Lhuillier Age-Group Tennis Championships nga mosikad na karong buntag didto sa CitiGreen Tennis Resort sa Barangay Punta Princesa, dakbayan sa Sugbo.

Ang ubang duwa sa eliminasyon banatan sab didto sa Pardo Tennis Club ug sa Alta Vista Golf and Country Club, apan ang tanang duwa sa semis ug ingon man sa finals adto na  sa CitiGreen.

Sa kinatibuk-an, 51 ka legs ang duwaon agi’g selebrasyon sa ika-10 nga anibersaryo sa maong torneyo nga sud sa naglabay’ng katuigan nakatabang paghulma sa abilidad sa pipila ka mga tang-an nga tennis players sa nasud karon.

Apil na niini mao sila si Cupper Francis Casey ‘Nino’ Alcantara, world tennis junior no.12 Alberto Lim Jr, 2015 SEA Games medalist Jeson Patrombon, Oklahoma University tennis scholar Jurence Mendoza, top female player Marian Capadocia, Khim Iglopas, ang managsuong Clarice ug Christine Patrimonio ug si Roxanne Resma, nga tua na karon sa University of Hawaii.

Dinhi sa Sugbo, ang maong torneyo nakatabang  pagbaid sa abilidad nilang Jan Godfrey Seno, Marc Suson, Francis Hidalgo, Shyne Villareal ug uban pa. (BANAT NEWS)