CEBU, Philippines – Ang University of San Carlos (USC) ug Sacred Heart School-Ateneo de Cebu (SHS-AdC) miselyado sa ilang sangka sa kampiyonato ubos sa Division 1 Under 12 age group sa Cebu Youth Basketball League (CYBL).
Ang USC nakabawos batok sa University of the Visayas (UV), 40-29, samtang ang SHS-AdC mitagak sa Don Bosco Technology Center (DBTC), 78-37, atol sa semifinals nga giduwa didto sa Magis Eagles Arena sa SHS-Ateneo de Cebu didto sa Barangay Canduman, dakbayan sa Mandaue.
Sa Under 10 division quarterfinals, ang No. 4 seed UV mipukan sa DBTC, 34-22.
Ilang hagiton sunod mao ang Monterey School of Talisay, samtang mag-abot ang sister teams USC North ug South sa laing duwa sa semis.
Sa mga duwa sa Division 2, ang Magis Eagles milansang og duha ka daog sa Under 15 division. Ang SHS-AdC 2 mipalagpot sa St. Alphonsus Catholic School (SACS), 71-48, samtang ang SHS-AdC 3 mipasibat sa UV Mandaue, 98-76.
Samtang sa Division 2 Under 12 semis, ang SACS miposte og 53-17 nga demolisyon sa DBTC-B aron pag-angkon og luna sa finals diin ilang kontrahon ang mopatigbabaw sa duwa tali sa Monterey ug Ormoc. (BANAT NEWS)