CEBU, Philippines – Gipangandaman sa Alaska Aces ang bangis nga pagbalik sa defending champion San Miguel Beermen sa sunod nilang panag-abot sa Game-2 sa ilang best-of-seven finals series karong gabii didto sa Smart Araneta Coliseum.
Nalipay si Alaska coach Alex Compton sa ilang ‘come-from-behind’ nga kadaugan sa Game-1, apan naalarma sila tungod kay naglisud sila pagsumpo sa Beermen bisan pa og wala niduwa ang sinaligan niining si JuneMar Fajardo.
Sa ilang 100-91 nga kadaugan, ang Alaska kinahanglan pa nga mohimo og milagro sa final period diin ilang gipapas ang 12 puntos nga labaw sa San Miguel.
Si Compton buot sab og mas kumbinsido ug dominante nga kadaugan karon batok sa San Miguel.
Sa iyang bahin, si Beermen coach Leo Austria mibati og kompiyansa nga makarekober sila karon ug matabla ang serye bisan wala ang sinaligan nilang sentro tungod sa injury.
Dili hinuon seryoso ang injury ni Fajardo, apan positibo si Austria nga ilang matabla ang serye pinaagi sa paggamit sa uban niyang key players sama nila ni Arwind Santos, Alex Cabagnot, Chriss Ross ug Marcio Lassiter.
Ilang atbangan ang mga alas sa Aces nga sila si Calvin Abueva, Sonny Thoss, JV Casio, Cyrus Baguio ug Chris Banchero. (BANAT NEWS)