CEBU, Philippines – Ang beteranong si Johnny Arcilla mipahimos sa halapad niyang kasinatian aron pagbuntog sa mas batan-on ug mas agresibong si Francis Casey ‘Niño’ Alcantara sud sa tulo ka kulbahinam nga sets aron pagsakmit sa men’s open title sa Cebu leg sa 1st Peugeot Philippine Tennis Open didto sa Cebu Country Club sa miaging gabii.
Maayo ang gipakitang labok sa 23-anyos nga si Alcantara pagsugod sa duwa diin siya miposte og 4-1 nga labaw nga iyang gihatod ngadto sa 6-4 nga daog.
Apan wala magpaalkansi si Arcilla, kinsa impresibo kaayong mibawos bisan tuod og munasginhawa niyang pagkulit og 7-5 nga daog sa ikaduhang set aron pagpuwersa og rubbermatch.
Sa decider, gipahimuslan og maayo ni Arcilla ang kahigayonan nga gibati og kaluya si Alcantara dayon na ngadto sa pagselyado sa duwa, 6-4.
Gawas sa medalya, give-aways gikan sa Wilson ug luna sa national finals, si Arcilla mibulsa sab og P20,000 nga ganti. Samtang si Alcantara, bisan sa iyang kaparotan, duna gihapoy ikapasigarbo human siya ug ang Sugbuanon niyang partner nga si Marc Norman Enriquez mipilde nilang Arcilla ug Jan Godfrey ‘Noy’ Seno, 6-3, 1-6, 11-9 aron paglabni sa korona sa men’s doubles.