Paon ni Arum

Giuwan og pagsaway sa mga fans tibuok kalibotan ang desisyon ni Manny Pacquiao nga si Tim Bradley, ang kasamtangang WBO welterweight champion nga maoy iyang sangkaon pagbalik niya og away karong Abril 9 didto sa MGM Grand Garden Arena sa Las Vegas, Nevada.

Dili nato sila mabasol kay ato mang nakita nga sa nag-una nilang duha ka engkuwentro, dominante kaayo si Pacquiao. Sa maong mga higayon, parehong kulatado ug wa’y dag-anan si Bradley bisan tuod og sa dili masabtan nga desisyon si Bradley maoy nidaog sa una nilang engkuwentro niadtong Hulyo 2013. 

Bangis hinuon kaayo ang panimalos ni Pacquiao nga mibatil og kulata ni Bradley sa ilang ‘rematch’ niadtong Abril 2014.

Karon nga si Pacquiao nakahukom nga harungon sa ikatulong higayon si Bradley, daghan ang nadismaya niini. Bisan og nakasabot ko sa ilang sentimento, angayan natong huna-hunaon nga 'boxing is business' ug si Top Rank chairman Bob Arum,  ang promoter ni Pacquiao, usa ka marketing genius ug marunong kaayo niining aspeto.

Sa akong basa, dili lamang kang Pacquiao nagagikan ang maong desisyon kun dili sinabotan nilang duha ni Arum. Si Pacquiao gusto og kontra nga kaya ra niya kaayo aron siya makakulit og impresibong daog nga dili lamang makahumot sa iyang imahe sa hinangat nga eleksiyon karong Mayo, apan makapaduol sab kaniya sa luwag sa usa ka mas daku nga away lagmit batok ni Terence Crawford, ang wa’y pildeng WBO super lightweight champion, sa dili pa matapos ang tuig.

Si Arum dunay kontrata ni Pacquiao nga mapupos karon pang Disyembre 31, 2016 ug kay pareho mang anaa sa iyang poder  sila si Bradley ug Crawford, dili ko mokagat sa gibandiwag sa sayo pa ni Pacman nga kutob na lang siya sa usa ka away kay andam na siyang moretiro ilabi na kun modaog pagka-Senador sa bugnong lugaynon upat ka bulan gikan karon.

Kun pakgangon niya og usab si Bradley, dali ra unya nga iturotot ni Arum nga dili pa angayan si Pacquiao nga moretiro kay duna pa siya’y ikabuga. Mapilde man o modaog pagka-Senador, dunay rason si Pacquiao nga dili dayon dayonon ang giplano niyang pagretiro.

Kun ugaling modaog, dili ba mas nindot paminawon sa dunggan nga pagatawgon siya ni Michael Buffer nga 'the fighting Senator from the Philippines' nga seguradong makapatik niya og laing kasaysayan. Simbako mapakyas sa iyang tinguha nga molayat sa Senado, mas kinahanglan pa nga moaway sa katapusang higayon si Pacquiao aron siya makahatag og haum nga pagtak-op sa iyang karera ug makiangayon nga panamilit sa iyang mga dumadapig.

Balik ta sa pagpili ni Pacquiao og mas sayon nga kontra. Sa akong pamulso, usa lamang kini ka paon nga gilabyog ni Arum kay daku ang akong pagtuo nga duna pa siya’y giluto nga mas lami nga putahe alang sa Pinoy ring superstar sa umaabot. 

Dili pa ka kasulti kun unsa kini, apan kun mangutana mo kun apil pa niini ang rematch nilang Floyd Mayweather , Jr. sama sa gihandum sa atong idolo, para nako hanap pas diyes panas kining mahatagan og katumanan.

Gani matud pa sa akong higala nga si Gary Cortes, ang head coach sa University of the Visayas (UV) Green Lancers, nga mas motan-aw pa siya og cartoon show nga "Tom and Jerry' bisan og i pay-per-view kini nungka sa MayPac rematch, kun ugaling kini mahinayon.

Kun dunay mga komentaryo o reaksiyon mahimong mo-email sa [email protected]