CEBU, Philippines – Nabalaka ang San Miguel Beermen sa lisud nga hagit batok sa Rain or Shine Elasto Painters nga ilang ikasangka karon sa Game-1 sa ilang “best-of-seven” semifinals series sa PBA Philippine Cup didto sa MOA Arena.
Mismo si Beermen coach Leo Austria miangkon nga usa ka delikadong Rain or Shine ang ilang sangkaon karon sa semifinals ug nakita niya nga mas gutom ang Painters nga modaog ilabi na nga padayon pa kining nagpangita sa labing una nilang All-Filipino Cup title sa ilang franchise.
Adunay basihan ang kabalaka ni Austria dihang napilde sila sa Painters, 84-99 atol sa ilang duwa sa elimination round diin napakita sa Rain or Shine ang ilang kadominante batok sa defending champion.
Saligan gihapon ni Austria ang reigning MVP nga si JuneMar Fajardo nga maoy motimon sa ilang opensa, apan sayod siya nga napangandaman na kining daan sa mga batos ni Rain or Shine coach Yeng Guiao.
Seguradong masentro sa depensa sa Painters si Fajardo diin motubag sa hagit batok sa iya unyang mga defender sama nila ni Beau Belga, Jewel Ponferada, JR Quiñahan ug Raymund Almazan.
Naglaum sab si Austria og igong suporta alang ni Fajardo ilabi na gikan sa ubang sinaligan sa Beermen sama nila ni Arwind Santos, Marcio Lassiter ug Alex Cabagnot. (BANAT NEWS)